Monthly Archives: January 2012

有時也想以前一些我很喜歡過的，很沉迷過的，親近過的，陪伴過我的。 倒閉了的香港仔永安，銅鑼灣三越，皇室堡，Paris Cafe，太古城UNY。 那光景依家歷歷在目，但風光已經不復存在了。 小弟中學也已經裝修又裝修了。 誰說桃花依舊？ 人面固然全非，桃花也早謝了。 一直放不開的，只是自己。 戀戀不捨的風景，只存在在腦海中，誰都不懂得，誰都不了解。 越來越多最愛，沒有留在身邊的最愛。 越會疑惑，其實自己根本沒有最愛，每一個都是過客，那段時候的風景，剛好夠刻在眼底，就逝去了。 三越拆掉，paris cafe 倒閉，UNY rebrand，皇室堡大裝修，又有誰放得過去？ 沒有。越急於前進的人，對過去越放不開。 越是沒有事的人，最痛。

有趣既係，少女時代既女fans 係多過男fans。 我不喜歡少女時代，但不同於hoodie和空姐，對於少女時代，我簡直是恐懼。 少女時代，青春少女，全部一樣樣，長腿，跳舞，扮姣，扮電人，全都是高度資本主義底下極致的商業計算。 每當看到被煞到的毒男宅女的時候，我就有一種世界走向滅亡的感覺。 這如同七彩斑爛的菇和毒蛇，感情上覺得漂亮，但理性很明確的告訴我，這是不能接近的。

又有厭世文寫。 尋日其實寫左一大段，不過chrome 一hang 就無晒。 呢排上youtube 都係用opera穩陣。 之前話憎hoodie 係話無線條唔啱女仔著，呢排我又有新理論。 著hoodie 其實係虛偽同貪慕虛榮既表現。 虛偽因為扮hea，其實著hoodie一啲都唔hea，一有大大頂帽梗著唔舒服，二係過頭捐其實好麻煩，三唔可以著黎瞓覺，因為厚又有帽。質料一係好似衛衣polo咁鞋烚烚，一係就毛茸茸。 簡單一件tee一件背心一條連身裙仲hea過著hoodie，著恤衫打tie都無粒件hoodie咁辛苦。 根本就唔hea唔頹麻鬼煩，但俾人用黎扮hea 扮頹扮唔打扮，虛偽。 貪慕虛榮因為好多hoodie 都鐘意大大隻印字係前面，慌死人唔知佢著緊咩牌子咁，牌子logo都可以有美感，apple 同fred perry個logo就好靚，nike 個tick 都好正，但大大四隻字印NIKE出黎就好鬼死核突，成個代言人咁，有錢收咩。 而hoodie 最興就係印到大大隻字係心口度，GAP又好，HOLLISTER又好，UNIVERSITY OF HONG KONG，UNIVERSITY OF LONDON，UCL，全部都肉酸到死，仲慌死人唔知你著緊GAP，讀緊UCL咁，好巴閉咩。 簡直同大陸人鐘情既名牌monogram同出一轍，係咪好巴閉呢，我個LV袋上面印左七百個「LV」嫁。 做人都係subtle啲好。 －－－－－－－－－－－－－－－－－－－－－－－－－－－ 啱啱有朋友講起佢考左空姐，又聽左個空姐電話，先醒起，我好鬼憎空姐，空少唔憎，剩係憎空姐。 空姐是美其名，實際上根本就是待應，就是服務性行業，從事服務性行業係應該有返做服務性行業既態度，而佢地無。 成日黑口黑面，以為自己著套制服花個核突嚇鬼妝梳起個頭就巴巴閉咁，講一句廣東話佢有能本事夾左三個英文單詞落去，但次次講食咩我又無次聽到你up乜。 一個月返得個幾十個鐘講到自己飛黎飛去好鬼辛苦咁，話呢個乘客點個個機長點，對著客人又黑口黑面笑容都唔多個，寸寸貢咁，連基本既禮貌同應有既態度都欠奉。 擺咩款啫，隨時根本大學連都入唔到，去到巴黎剩係識巴黎鐵塔同行名店，去倫敦咪又係睇london eye 同大笨鐘。 以為自己飛黎飛去就好有學識好有見地咁，超。 簡直係港女既典範。

apple 啲app 都係唔update 好。 up 親都無好野。

Youtube真係好。 呢幾日搵返好多舊片睇。 Gameboy玩既Mario，Sega Saturn 玩既炸彈人，N64玩既Mario Kart，中二玩既Diablo II。 諗過搵返黎玩，個諗深一層，其實就算搵到都唔會玩。 或者變既，其實係我地。 其實唔係忙，再忙都有時間，只係再提唔起個份衝勁，寧願玩iphone啲無聊game都唔想闖一次高質RPG。 但以前真係一隻好game可以玩幾個月甚至乎幾年。依家個啲搭車玩幾次已經唔想玩。寧願坐係度發下牛抖放空，蒲下facebook。

道不同，不相為謀。 太多事不足為外人道。 「不解釋就不懂的事，就代表怎樣解釋也不懂。」《1Q84》中天吾的父親這樣對天吾說。 你可以勝出一個辯論，不代表你可以說服對方。 ——————————————– 我細細個就唔鐘意去camp，覺得去camp唔好玩。 因為去camp係迫你玩。 任何要用力既野，已經唔過癮，因為係為玩而玩。 最正最正既，永遠都係「好悶呀，搵啲野搞下啊」之類的事。 要傾計，最好都係放小息或者放考試break，特登約出黎，已經無咩feel。 唱歌永遠係上上下網禁youtube 跟著唱先正，專程去唱K反而唔係咁想唱。

我非常唔鐘意蘇打綠隻新碟。 蘇打綠一早應該過左做治療系的階段，就像容祖兒不會再唱慘情歌，Twins不會再賣青春校園。 經歷過戀過大過天，痛愛過心淡過眼紅紅過，唱過飲歌，寫過我們的紀念冊，就該開始桃色冒險，在花千樹中尋找Lucky Star了。 是啊我們都曾經有過很愉快的日子，但美好的時光總會過去，總不能一直不變，一直留在這裡。 長此不前進，最後成就的必然不是讓美景停留，是讓原本都美好的東西砸爛。

「其實佢都幾幸福，成日拍到長拖。」 「長拖係個人努力。」 「咁都要有人肯同佢努力先得。」 好吧。就這樣的好。就只能這樣。我很喜歡容祖兒的舊歌，昨天在聽沙堡壘和這分鐘更愛你。比起現在的祖兒，我更喜歡那個青澀的她。當然，也是說那時候的她。若現在的她想做回那個祖兒，就不是味兒了。連重唱那些歌都不行。當技巧圓滑了，個人成熟了，有些東西就註定失去。 我們也是這樣吧。嘗試找回一年前的自己，一年前的朋友。這一切已不可得。當初大家是機緣巧合而一起的，可一不可再。那段時光，快樂固然值得慶幸，若是哀傷的，也都過去了。 為何無法讓美景暫停？為何無法避免掉眼淚？ 成長了，慢慢就接受了。曾經覺得不可理解的，不可理喻。也許依家不能理解明白，但那種竭斯底里已不復存在，或者只是某一天走在街上，抽一口煙，就把往事放過去了。越去抓緊，也只會使大家受傷。習慣了，麻目了，適應了，接受了。坦白的，我也不明白為甚麼人無法真誠去愛，為甚麼要猜猜度度，為甚麼要離去心愛的人。 「忘了是誰說的──成長是人生唯一合理的事情。我已活過渡邊、直子的二十歲了，但到了今天，我依然無法理解生命中的許多痛苦與無奈，我依然無法明白為何人要傷害另一個人，人為何不能真誠去愛。我不理解，但我接受，因為成長是人生唯一合理的事情。」 — 王迪詩

好多人唔知咩叫歧視，香港人從來都無歧視過大陸人。 一竹篙打一船人都唔係叫歧視，只係以偏概全。 黑人普遍學歷比白人低，在不清楚情況下聘請白人也不算歧視，是基於概率所作出的判斷。 若在黑人和白人的條件完全一樣的情況下，還是請白人而不請黑人，就是歧視了。 －－－－－－－－－－－－－－－－－ 擇偶條件 讀名校，但不要拔萃。像sh, mcs, ywgs, pc, ssgs, bps之類就好。三大，g5, ivy league也算。 家境富裕，但不能太富裕，要有凡人金錢觀念。 蒲開銅鑼灣（有去現代補習，食過pancake colours，榮記粉麵）。 住港島。 愛讀村上春樹。 有文學之外的才華。 非常漂亮。 中一個就夠。 依家諗返起以前啲女友好似全部都唔中(所以散左)，反而好多傾得埋既friend唔多唔少中左幾個。 所以其實係擇friend 條件先真。

我喜歡唱歌，喜歡寫短信，喜歡傳長訊息，喜歡說體己話。 更喜歡給喜歡的人做我喜歡的事。 但都不會。 給喜歡的人做喜歡的人，對方便知道我喜歡她了，然後就會不喜歡我了。 喜歡一個人就藏在心裡。 自你之後，有碰過紅顏，也遇到知己。 但像你這樣的紅顏知己，可說是絕無僅有。